’n Versterkte Maties-studentespan het die WP se Superliga A-eindronde Saterdag (23 September) op City Park in Athlone in gure, winderige weer met 28-13 geklop.
Maties het uiteindelik vier drieë gedruk en Helderberg twee. Die studente was binne vyf minute ná die afskop voor ná ’n verdoelde drie (7-0).
Tien minute later het die Helderberg-skrumskakel, Michael Visser, sy span se rekening met ’n strafdoel geopen (7-3).
Die aksie was baie gelyk vir die res van die helfte totdat die Maties in die 34ste minuut ’n tweede verdoelde drie aangeteken en die rustydtelling op 14-3 te staan gebring het.
Tien minute ná die hervatting het Maties se skrumskakel agter die pale gaan druk vir ’n maklike doelskop (21-3). In die 66ste minuut het Berge se puik slot, Shane Kennedy, ná ’n voorspelerstormloop gaan druk (21-8).
In die 71ste minuut het Berge se heelagter, Jeandre Lukas, ’n opwindende drie in die hoekie gaan druk (21-13). In die doodsnikke van die stryd het die studente hul vierde drie gekry om die wedstryd 28-13 te wen.
Hierdie was die laaste vyftienman- rugby van die jaar. Nou lê die WP se seweskompetisie voor, en almal wag in spanning
Lin Beukes en Kyle Leibrandt bestuur Helderberg Rugbyklub se sewesspan.
