Ricardo Absalon, ’n vrywilliger van die Western Cape Missing Person Unit, is steeds vasbeslote om die vermiste Cameron Owies van Macassar op te spoor.
Dié saak gee hom egter langer as ’n jaar ná Owies se verdwyning nog slapelose nagte. “Ek sal nie ophou totdat ek vir sy familie antwoorde kan gee nie,” sê Absalon.
Owies is laas op Maandag 3 Julie 2023 omstreeks 03:00 by sy ouerhuis in Macassar gesien. Hy is lank en skraal, en het bruin oë en swart hare. Hy het ’n kenmerkende geboortemerk op sy rug in die vorm van Afrika.
Tydens sy verdwyning het hy ’n K-Way-baadjie, ’n blou-en-wit T-hemp en wit jeans aangehad.
Owies, wat aan skisofrenie ly, het voorheen ook al verdwyn.
Volgens Absalon is die afgelope jaar besonder uitdagend. “Ek moes al te veel keer na lykshuise gaan om liggame te identifiseer,” vertel hy.
“Die ergste is dat sy familie steeds geen antwoorde het nie.”
Absalon, wat al jare lank lid is van die Western Cape Missing Person Unit, sê die probleem van vermiste mense in gemeenskappe soos Macassar is baie kompleks.
“Mense wag soms dae voordat hulle ’n verdwyning by die polisie aanmeld. Dit maak dit net moeiliker om iemand op te spoor – veral kinders,” verduidelik hy.
Volgens luitenant-kolonel Arnold Roux, die stasiebevelvoerder van die Macassar-polisie, word spoor-leidrade dikwels koud as mense te lank wag om ’n vermiste aan te meld. “Daar is geen wagtydperk om iemand as vermis aan te meld nie. Die oomblik wanneer iets buitengewoons gebeur, moet ouers dadelik optree.”
Nietemin is daar ook goeie nuus. Vanjaar is 23 vermiste-mense-sake in die Macassar-polisiëringsgebied aangemeld, en almal is suksesvol opgelos danksy samewerking tussen die polisie en organisasies soos die Western Cape Missing Person Unit en die sogenaamde Pink Ladies.
“Ons kon hulle opspoor omdat hulle as vermis aangemeld is. Ons weet egter nie hoeveel mense nog vermis is van wie niemand bewus is nie,” sê Absalon.
Hy voeg by dat ouers ook hul kinders moet help deur hulle te leer om selfoonnommers te onthou en ongewone gedrag vinnig aan te meld. “Ons as ouers moet ons kinders se roetines ken en in enige afwykings onmiddellik optree.”
Hoewel Absalon trots is op die opgeloste sake, bly hy steeds op die opsporing van Owies fokus.
“Ek gaan aanhou soek totdat ek vir sy familie antwoorde kan gee. Hulle verdien om in vrede te leef,” sê hy.
- Enigeen met inligting oor waar Owies is, kan Absalon by 074 407 1078 of die Macassar-polisie by 021 857 7100 skakel, of indien jy iemand as vermis wil aanmeld.
