Die violis Nicholas Bruiners, ‘n bronsmedaljewenner van die 2017- Nasionale Jeugmusiekkompetisie (NJMK), keer vanjaar terug om as gaskunstenaar by die finaliste se galakonsert op te tree.
Bruiners sal die Vioolkonsert nr. 5 in A mineur, Op. 37 deur Henri Vieuxtemps in die konsertfinale saam met die Kaapstadse Filharmoniese Orkes (KFO) uitvoer. Die konsert sluit die uitmergelende 2025-NJMK af, wat van Maandag 1 tot Saterdag 6 Desember in die Endler-saal in Stellenbosch plaasvind.
Die dirigent vir die 2025-galakonsert is maestro Brandon Philips, wat ‘n lang geskiedenis met die kompetisie het. Die konsert begin om 18:00 en bestaan uit ‘n overture, die ses finaliste-soliste en die uitvoering van die gaskunstenaar.
Bruiners, ‘n boorling van Mowbray in Kaapstad, was op 17 die naaswenner in die NJMK se strykinstrument-afdeling en het met ‘n bronsmedalje en R3 000 weggestap. ‘n Jaar later is hy genooi om as een van die nege skadujurielede vir die 2018-kompetisie te dien.
In 2023 het het by die KFO as lid in die eerste vioolafdeling aangesluit. Ná matriek het die talentvolle violis onder die leiding van prof. Farida Bacharova aan die Universiteit van Kaapstad gestudeer, waar hy in 2022 sy BMus in Uitvoering met onderskeiding behaal en in 2023 sy Uitvoering-honneurs voltooi het. Hy was ook by dié universiteit die ontvanger van die Kamermusiekprys, die Leonard Hall-prys en die Alfred Libochowitz-prys.
“Ek is opgewonde om na die NJMK terug te keer. Agt jaar gelede was dit ‘n senutergende ervaring om teen 20 ander jong, talentvolle musikante mee te ding, maar dit het ook my liefde vir musiek en optredes bevestig.”
Die jaarlikse kompetisie is 41 jaar gelede deur Michael Maas in Port Elizabeth begin. Die NJMK- eerste prys van R36 000 word nou die Michael Maas-gedenkprys genoem.
Die NJMK-finaliste se galakonsert is die hoogtepunt van die kompetisie, waar 22 gekeurde deelnemers uit Suid-Afrika ‘n uitgebreide repertoire uitvoer. Hulle word deur sewe gewaardeerde klassieke- musiekakademici en -kundiges beoordeel.
Toegang vir die eerste drie rondes van 1 tot 4 Desember is gratis. Kaartjies, vanaf R110, vir die finale ronde se galakonsert is beskikbaar deur Quicket.
Twee DistriksPos & Helderberg Gazette-lesers kan elk ‘n dubbele stel kaartjies, ter waarde van R380, vir die galakonsert wen. Om jou naam in die hoed te gooi, voltooi die vorm hieronder. Die wenners sal per telefoon gekontak word.
Nasionale Jeugmusiekkompetisie
Wen kaartjies na die 2025- Nasionale Jeugmusiekkompetisie by die Endler-saal in Stellenbosch.
You must be logged in to post a comment.